Azərbaycan NATO qüvvələri ilə hərbi qarşılıqlı fəaliyyət qabiliyyətini Operativ Qabiliyyət Konsepti (OCC) Qiymətləndirmə və Rəy (E&F) proqramı vasitəsilə davamlı olaraq inkişaf etdirir. Bu çoxşaxəli hərbi vasitə NATO və tərəfdaş ölkələr arasında sıx operativ əlaqələri təşviq edir, NATO standartları və prosedurlarına uyğun tam qarşılıqlı fəaliyyət və əməliyyat qabiliyyətinə malik qüvvələrin inkişafına dəstək verir.
Azərbaycan 2006-cı ildə OCC proqramına qoşulduqdan sonra əhəmiyyətli irəliləyişlər əldə etmiş, OCC prosesinə daxil edilməsi məqsədilə bir sıra hərbi birləşmələr yaratmışdır. Bu birləşmələr tələb olunan qiymətləndirmələri uğurla başa vurmuş və NATO sertifikatı almışdır.
Azərbaycan, həmçinin, milli qiymətləndiricilər hovuzunun inkişafına böyük önəm verir. Azərbaycanlı zabitlər OCC qiymətləndirmə kurslarında və digər tərəfdaş ölkələrdə keçirilən qiymətləndirmələrdə iştirak edirlər. NATO-nun OCC ekspertlər hovuzunun bir hissəsi kimi, Azərbaycan zabitləri tez-tez tərəfdaş ölkələrdə qiymətləndirici və komanda rəhbəri qismində fəaliyyət göstərməyə dəvət olunurlar, burada öz bilik və təcrübələrini bölüşürlər. OCC Qiymətləndirmə və Rəy (E&F) proqramı Azərbaycan zabitlərinin NATO Komandanlıq Strukturu çərçivəsində OCC ilə bağlı vəzifələrdə fəaliyyət göstərmələrinə də şərait yaradır. Hazırda bir çox Azərbaycan zabiti Tərəfdaşlığın Qərargah Elementi (TQE) Konsepsiyası çərçivəsində müxtəlif NATO qərargahlarında OCC ilə əlaqəli vəzifələrdə xidmət edir.
OCC proqramında davamlı iştirak vasitəsilə Azərbaycan yalnız NATO qüvvələri ilə qarşılıqlı fəaliyyət qabiliyyətini artırmır, həm də müttəfiq qüvvələrlə daha güclü əlaqələr qurur. Bu əməkdaşlıq Azərbaycanın Avro-Atlantik təhlükəsizlik çərçivəsində yüksək səviyyəli əməliyyat hazırlığı və qarşılıqlı fəaliyyət qabiliyyətini qorumağa sadiqliyini bir daha təsdiqləyir.